【健身BB班】 健身初哥要點訓練好?

每逢到咗炎炎夏日，都會有唔少人走去做gym。無他嘅，可以做運動之餘又唔駛日曬雨淋嘛。不過對於初次接觸健身嘅你，又知唔知做啲咩訓練先可以幫到你塑造理想嘅身形？

首先，你要透過伸展訓練去放鬆過度繃緊嘅肌肉，然後去強化比較弱嘅肌肉。如果你唔一開始就處理肌肉過緊嘅問題嘅話，當開始加強訓練力度嘅時候，你嘅關節就會好容易出事。特別係如果你係有圓肩、骨盆前傾、駝背之類嘅問題嘅話，就要更加注意拉筋嘅訓練喇。

跟著就係練一啲基本動作，例如深蹲、硬舉、肩推等等。雖然呢啲動作要做得好係唔容易嘅事嚟，但係基本上只要做好基本嘅動作嘅話，就可以令你操肌嘅過程變得順利，而且你可以透過做呢啲動作去觀察自己嘅身體係咪有肌肉唔平衡嘅地方，然後進一步去重點操練較弱嘅肌肉。